Kamusta, mga KaSosyo at KaNegosyo! Nais kong pag-usapan ang isang importanteng tanong: “Epektibo ba ang pagtitipid lang para makaipon?” Alam naman natin na sa panahon ngayon, mahirap ang buhay, at natural lang na hanapin natin ang lahat ng paraan para makatipid. Pero sapat na nga ba ang pagtitipid lang?

Sa totoo lang, mga KaSosyo, kilala tayo sa pagiging masinop. Lahat ng klase ng pagtitipid, nasubukan na natin. Pero, may hangganan din ang pagtitipid. Sabi ko nga, nasaid na yata natin ang lahat ng paraan para babaan ang ating mga gastos. Kaya, dapat nating isipin, may iba pa bang paraan para makapag-ipon nang higit pa?

Totoo na malaking tulong ang pagtitipid sa ating pag-iipon. Subalit, kailangan din nating tandaan na may limitasyon ito. Kung gusto nating lumago ang ating savings, hindi sapat na bawasan lang natin ang ating mga gastos. Kailangan din nating palakihin ang ating kita.

Paano ba natin ito gagawin? Isa sa mga solusyon ay ang pagkakaroon ng extra income. Kahit maliit, basta’t legal at walang inaabuso, malaking tulong na ito. Maraming paraan para kumita ng extra – maaaring sa pamamagitan ng part-time work, small business, o online freelancing.

Ngunit, syempre, may paalala ako: ang extra income ay hindi dapat winawaldas. Dapat ay may balance. Ienjoy mo rin ang iyong pinaghirapan. Gawin natin itong 50-50. Ang kalahati ng extra income, gamitin mo para sa sarili o pamilya, at ang kalahati ay ilaan mo sa savings o investment. Sa ganitong paraan, hindi ka lang nag-eenjoy, kundi lumalago rin ang iyong yaman.

Ang mahalagang aral dito, mga KaSosyo at Kanegosyo, ay ang paghahanap ng balanse sa buhay. Hindi lang puro pagtitipid, kundi pati na rin ang paghahanap ng ibang paraan para kumita at lumago. Ako si Sir Vince, ang inyong financial guro, nagsasabing, ang pagyaman, napag-aaralan at napagtutulungan!