Mga KaSosyo at KaNegosyo, kamakailan lang, nagkaroon ako ng pagkakataong makipag-usap kay Cheryl Cosim tungkol sa paghawak ng ating finances. Isang malaking karangalan ito para sa akin at excited akong ibahagi sa inyo ang mga naging punto ng aming talakayan.

Sa aming pag-uusap, tinalakay namin ang tungkol sa spending behavior ng ating mga kababayan. Aminin man natin o hindi, marami sa atin ang nagsikip ng sinturon at nagtipid dahil sa realidad ng buhay dito sa Pilipinas. May ilan din na nangutang para sa mga selebrasyon, pero mas marami ang piniling magtipid at nakontento na lang sa simpleng selebrasyon kapag holiday season.

Napag-usapan din namin ang kakayahan ng mga Pilipino na mag-ipon at mag-invest. Naniniwala ako na kaya nating mga Pinoy ang mag-ipon at mag-invest. Ang tunay na hamon lang talaga para sa marami sa atin ay ang source of income. Kadalasan, hindi sapat ang kinikita para sa ating mga pangangailangan, kaya’t kakaunti lang ang natitira para sa pag-iipon at pag-invest. Ngunit, hindi ito dahilan para sumuko. May mga paraan pa rin para malagpasan ang mga hamong ito.

Isa sa mga pinakamahalagang payo na ibinigay ko sa panayam ay ang kahalagahan ng pagkakaroon ng malinaw na focus at layunin sa pag-iipon at pag-i-invest. Dapat ay mayroon tayong clear goals na nais nating abutin, at lagyan natin ang mga ito ng prayoridad. One goal at a time para mas focused at maayos ang pag-abot ng mga pangarap.

Mahalaga rin na unahin natin ang pagkakaroon ng emergency savings. Ito ang magiging pundasyon natin para sa mga hindi inaasahang pangyayari sa buhay, tulad ng sakit o aksidente.

Kaya mga KaSosyo, kung iniisip ninyo kung kailan dapat simulan ang pagsave at pag-invest, ang sagot ay, ngayon na! It’s never too early para maghanda para sa kinabukasan. Kahit bago pa lang kayo sa trabaho, mahalaga na isipin na ninyo ang inyong retirement. Isipin ninyo na sa edad na 60, magiging komportable na ang inyong buhay dahil maaga kayong naghanda.

Gusto kong ipaalala sa inyo na ang pagyaman ay hindi lang para sa sarili nating kinabukasan kundi pati na rin para sa ating mga mahal sa buhay. Kaya, magtulungan tayo at pag-ibayuhin pa ang ating kaalaman sa tamang paghawak ng ating pinaghirapang pera.

Muli, ako si Sir Vince, ang inyong financial guro, nagsasabing, “Ang pagyaman, napag-aaralan at napagtutulungan.”