Likas sa ating maghangad na makakuha ng discounts. Understandable naman kasi pinaghirapan natin ang perang bibitawan natin. Gusto lang nating makasulit at siguradong value for money ang bibilhin. 

Pero may tamang lugar para dito. May mga pagkakataon kasing dapat iwasan nating mambarat dahil mahihirap ang dehado o kaya’y mga kapamilya’t kaibigan ay apektado. 

Kaya gumawa ako ng iwas barat campaign. 

Iwas tawad sa mga tindera

Kapag bumili ka sa mga shops sa mall o kaya ay namalengke sa supermarket, humihinginka ba ng tawad? Hindi di ba? 

Sana ganun din kapag sa palengke, talipapa o bangketa tayo bumili. Pero siyempre, dapat alam din natin na hindi overpriced ang tinda para win-win ang situation. 

Mga maliliit na negosyante o microenterprises kasi sila na kabilang sa informal sector. Dito nakasalalay ang kanilang kabuhayan at makakadagdag ka sa paggaan ng kanilang buhay kung di ka na mambabarat at hihingi ng tawad. 

Magbigay ng tip sa carinderia

Kapag kumakain tayo sa restaurants nagbibigay tayo ng tip. Ang ilang fastfood ay kargado na ng service charge ang babayaran mo

Pero pag karinderia, di tayo nagbibigay ng tip. Tiyak mas sasaya si manang kung mag-iiwan tayo ng tip to appreciate her service. Kaunting barya lang, mapapangiti siya. 

Suportahan ang mga nagsisimulang maliliit na negosyante

Mahirap magsimula ng negosyo. Kaya imbes na humingi ng discount, free sample o libre sa kanila, bumili na lang tayo. 

Mas mararamdaman nila ang malasakit sa pakikiisa natin sa kanila sa ganitong paraan. 

Tumulong sa marketing

Kung di natin kailangan ang binebenta nila o kaya’s sadyang walang budget  puwede tayong tumulong sa marketing ng kanilang produkto o serbisyo. Malaking tulong na kung i-promote mo sila sa social media accounts mo. 

Local economic development

Tandaan na sa mga malalaking establisiyemento ay di tayo tumatawad at hindi humihingi ng discount. Mayayaman na ang mga may-ari nun. Di nila kailangan tulong natin. 

Samantala, ang nga maliliit na negosyante ay nangangailangan ng ating suporta para sa kanilang ikabubuhay. Kaya sana, gawin natin ang aking mga suggestions sa itaas. 

Kung may mga suggestions kayong dagdag paraan kung paano mapapaigting ang ating Iwas Barat campaign, ilagay lang ito sa comments section. 

Ang pagyaman, napag-aaralan!