Hello mga KaSosyo at KaNegosyo!

Alam kong bugbog na bugbog na tayo sa walang tigil na pagtaas ng presyo ng gasolina sa world market. Dahil ang gasolina ay mahalagang sangkap sa supply chain at transportation, ramdam na ramdam natin ang domino effect nito sa mabilis na pagtaas ng presyo ng ating mga bilihin. Kaya hindi ako magsasawang ipaalala sa inyo ang aking rule ngayong krisis: Do not splurge dahil may oil surge!

Sa panahon ng krisis, marami sa atin ang ninenerbiyos pagdating sa pera. Ang nakakaloka, may mga tao na kapag up ang market, saka sila bumibili, at kapag down ang market dahil sa krisis, saka sila nagbebenta!. Ang sikreto talaga sa pag-iinvest: buy low, sell high.

Pero bago ko ituro ang strategy natin ngayon, gusto kong maging malinaw ito: savings discipline will always come first before investment discipline. Siguraduhing nabuo mo na ang iyong 9 months’ worth na emergency fund at nasusunod ang ating 5-10-85 budgeting rule. Ang investment ay para lamang sa extra mong pera. Kung cash-rich ka na, liquid, at may natitira pang pambili, dito papasok ang isang napakagandang diskarte: ang Peso-Cost Averaging.

Ano ba itong sinasabi kong Peso-Cost Averaging? Ang ibig sabihin nito, maglalaan ka ng regular na halaga regularly para iinvest, halimbawa, sa isang index fund na nagta-track sa Philippine Stock Exchange. Kung kaya mo ang P1,000, P5,000, o katulad ng ginagawa ko na P10,000 kada buwan, tuloy-tuloy mo lang itong inilalagay.

Bakit ito ang perfect na diskarte lalo na ngayong krisis? Dahil sa Peso-Cost Averaging, bumibili ka automatically whether mataas o mababa ang market. Dahil fixed ang budget mo buwan-buwan, kapag mataas ang presyo ng market, fewer units o mas kaunti ang mabibili mo. Pero heto ang magic kapag bagsak ang market dahil sa krisis: mas maraming units ang mabibili ng parehong halaga ng pera mo!.

Usually kapag may krisis, mababa ang presyo ng mga traditional financial products natin. Kaya kapag nakikita ko na lower than average ang market, minsan nagdadagdag pa ako ng kaunting pambili.

Para maging successful ka sa diskarteng ito, heto ang dalawang rule: Una, i-set up mo itong automatic sa iyong bank account para hindi mo na iniisip buwan-buwan. Pangalawa, take control of your emotions. Iresist mo ang urge na magbenta kung mababa ang presyo lalo na kung hindi mo naman kailangan ang pera. Iwasang maging padalos-dalos.

Ang krisis ay puwedeng maging oportunidad kung tayo ay nakapaghanda bago pa ito mangyari. Unti-untiin lang natin, dahil ang pagyaman ay isang mahabang proseso.

Ako si Sir Vince, financial guro, at your service. Ang pagyaman, napag-aarlan at napagtutulungan!