Mga KaSosyo at KaNegosyo, napakadalas nating itanong: “Paano nga ba ako makakaipon o makakapag-invest kung mayroon din akong utang?” Isang kritikal na tanong na nangangailangan ng praktikal na sagot. Ako si Sir Vince, ang inyong financial guro, narito para gabayan kayo sa inyong financial journey.

Unang-una, kung meron kang utang, mahalagang mag-focus muna sa pagbabayad nito. Pero hindi lang basta pagbabayad, kailangang magkaroon ng strategy. Kausapin mo ang iyong pinagkakautangan at bumuo ng isang payment plan na hindi magiging pabigat sa iyo. Tandaan, hindi kailanman matatapos ang utang kung hinihintay mo lang ang pagkakataong magkaroon ng malaking halaga para bayaran ito nang buo. Mas mainam na unti-untiin ito at siguruhin na ito’y kaya mong panindigan.

Pero, hindi lang pagbabayad ng utang ang dapat nating isipin. Mahalaga rin na sabayan mo ito ng pag-iipon. Hindi masaya yung sitwasyon na lahat ng pinagpaguran mo, diretso lang sa pagbabayad ng utang. Dapat, mayroon ka ring natitira para sa sarili mo. Ito ang konsepto ng “paying yourself first.” Pagsabayin ang pagbabayad ng utang at pag-iipon.

Alam niyo ba, kung gaano tayo kagaling mangutang, dapat ganun din tayo kagaling, o mas magaling pa, sa pag-iipon. Ipon ang solusyon, hindi utang! Madalas kasi, natutukso tayong magkaroon ng mga bagay ngayon na – mga gadgets, travel – at dahil gusto natin ng instant gratification, inuutang natin ito. Pero, KaNegosyo, sa ganitong paraan, mas mahal ang babayaran mo dahil may interest pa.

Kung gagamitin mo naman ang iyong ipon, makakatipid ka pa. Magkakaroon ka ng pagkakataong humingi ng discount at hindi ka pa magbabayad ng interest. Sa pag-ipon, may konsepto tayo ng delayed gratification – maaaring madelay ang pagbili ng gusto mo, pero in the long run, mas makakamura ka at mas mapapabuti ang iyong financial health.

So, KaSosyo at KaNegosyo, tandaan: utang at pag-iipon, dalawang aspeto ng finance na dapat balansehin. Gawing prayoridad ang pagbabayad ng utang habang nag-iipon para sa hinaharap. Maging maestro ng iyong finances at magtrabaho patungo sa isang mas maginhawang bukas.

Ang pagyaman, napag-aaralan at napagtutulungan!