Mga KaSosyo at KaNegosyo, usapang insurance tayo ngayon. Madalas kasi, hindi natin ito pinapansin hanggang sa kailanganin na. Pero, tulad ng sabi ko, “Ang pagyaman, napag-aaralan at napagtutulungan.” So, tara, aralin natin ‘to.

Unahin natin ang health insurance. Sabi nga nila, health is wealth. Tama ‘yan! Mas mainam na mayroon tayong insurance na magagamit habang tayo’y buhay pa. Imagine, kung may sakit ka, pero ‘di mo kailangang mag-alala sa gastusin. Ayos, ‘di ba? Lalo na kung ikaw ang breadwinner ng pamilya, kritikal ito.

Pero paano kung may dependents ka– yung mga batang wala pang 21 years old, o mga magulang na umaasa sa’yo? Dito pumapasok ang life insurance. Ito yung backup plan mo. Kung sakaling may mangyari sa’yo, hindi maguguluhan ang iyong pamilya sa paghahanap ng pera para sa kanilang pang-araw-araw na gastos. Life insurance ang magiging kapalit ng nawalang kita.

Sa totoo lang, dapat sana libre ang health services para sa lahat dahil sa universal health care, tulad ng libreng edukasyon. Kaso, aminin natin, hindi pa ganun kaperfect ang sistema natin sa Pilipinas. Kaya, minsan, kailangan nating magdagdag ng private insurance.

Naiinggit nga ako sa Australia. Kwento ko sa inyo, yung bayaw ko doon, nagkasakit, iniinda ang likod. Tawag lang siya sa doktor, lahat libre! Sana all, ‘di ba? Pero sabi nga nila, konting tiis pa, konting kembot pa. Papunta na rin tayo doon.

Pero, napansin ko rin, maraming Pilipino takot magpa-hospital sa government hospitals. May kwento pa nga, “Baka hindi na ako lumabas ng buhay.” Nakakalungkot, pero ganun talaga minsan ang realidad. Kaya mahalaga na meron tayong sariling plano para sa ating kalusugan.

Hindi natin dapat ipagwalang-bahala ang health at life insurance. Isipin mo na lang, ito’y proteksyon sa sarili at pamilya mo. Sa panahon ngayon, hindi lang sakit ang kalaban natin, kundi pati na rin ang kawalan ng kahandaan.

Ako si Sir Vince ang inyong financial guro, nagsasabing, ang pagyaman, napag-aaralan at napagtutulungan!