Hello mga KaSosyo at KaNegosyo!

Bugbog na bugbog na tayo sa dami ng krisis at sa walang tigil na pagtaas ng presyo ng gasolina sa world market. Dahil mahalagang sangkap ang gasolina sa transportation at supply chain, ramdam na ramdam natin ang domino effect nito na nagpapataas sa presyo ng ating mga pangunahing bilihin. Iyan ang tinatawag nating inflation. Kaya palagi kong paalala sa inyo: Do not splurge dahil may oil surge! Sa panahon ng krisis, dapat sa budget kumapit, sa utang huwag sumabit.

Kapag tumataas ang inflation, lumiliit ang purchasing power o ang halaga ng ating pera kung itatago lang natin ito bilang cash o sa ordinaryong bank account. Paano ba natin mapoprotektahan ang ating pinaghirapang pera? May paraan ba para maging inflation-proof ito?

Ang sagot diyan: Pag-IBIG MP2 at SSS Pension Booster.

Pero bago tayo pumunta sa ating investments, gusto ko munang linawin ang isang napakahalagang rule. Ipon talaga ang pundasyon ng ating investment. Savings discipline first bago ang investment discipline. Tiyakin muna nating nasusunod natin ang 5-10-85 budgeting rule (5% sa insurance, 10% sa savings, at 85% sa expenses) at sinisimulan na nating buuin ang 9 months’ worth na emergency fund natin. mas magandang mag-invest kapag tayo ay may emergency fund na.

Kung secured na ang iyong emergency fund at may extra ka pa, dito na papasok ang magic ng ating National Savings Programs. Bakit ko paborito ang mga ito?

1. Inflation-Proof Sila!

Para sa akin, ang paborito kong pinaglalagyan ng investment na inflation-proof ay ang Pag-IBIG MP2. Isipin ninyo, pumalo sa 4.1% ang inflation natin noong Marso, pero naglabas ang Pag-IBIG MP2 ng 7.1% na dividend. Ibig sabihin, mas mataas ang kinita ng pera mo kaysa sa pagtaas ng presyo ng bilihin. Ligtas ang halaga ng pera mo!.

2. Napaka-Affordable at Voluntary

Hindi mo kailangan ng milyon para mag-invest. Sa SSS Pension Booster, P200 lang na additional contribution ay puwede ka nang makapagsimula. Sa Pag-IBIG MP2, P500 lang ang kailangan. At ang akala ng marami, kapag nag-open ka nito, obligado ka nang maghulog buwan-buwan. Misnomer iyan! Voluntary po ito, kaya kahit gaano mo kadalas lagyan ay walang kaso. Kapag may extra ka, ihulog mo. Kapag gipit dahil sa krisis, pwedeng ipagpaliban.

3. Purposive at Ligtas (Tax-Free at Guaranteed)

Ang dalawang programang ito ay tax-free at guaranteed ng ating gobyerno. Walang kaba! Kapag nag-iinvest tayo, dapat purposive—alam mo kung saan mo gagamitin. Kung ang goal mo ay pang-downpayment ng bahay o pang-edukasyon ng anak after 5 years, perfect diyan ang Pag-IBIG MP2. Kung ang goal mo naman ay magandang retirement fund, wala pa ring tatalo sa SSS, lalo na kung dadagdagan mo ng SSS Pension Booster.

Ngayong panahon ng krisis, ang daming naglalabasang mga speculative investments lalo na sa TikTok na nangangako ng 5% o 10% na kita kada buwan. Tandaan ninyo ang aking rule of thumb: Kapag ang ipinangako sa investment ay greater than 12% per annum, kabahan ka na. If it’s too good to be true, malaki ang probability na ito ay scam. Huwag isugal ang perang pinaghirapan!

Unti-untiin natin ang pagpapalago ng ating pera dahil ang pinakamabilis na paraan ng pagyaman ay ang pagdahan-dahan.

Ako si Sir Vince, financial guro, at your service. Ang pagyaman, napag-aarlan at napagtutulungan!