Have a Question?

Mga KaSosyo at KaNegosyo, usapang investments tayo ngayon—pero siguraduhin nating hindi nakakaantok. Gamitin natin ang isang framework lalo na sa retirement planning: SEXY investments.

Ano ang SEXY?

S – Secure

E – Encashable o liquid

X – X-factor (may social o environmental impact)

Y – Yield o return

Importanteng unahin natin ang S, E, at X bago ka tumingin sa Y. Marami kasing nahuhumaling agad sa “Magkano ang kikitain ko?” pero nakalilimutan tanungin kung ligtas ba, madaling makuha ang pera kapag kailangan, at may ambag ba sa lipunan.

Limang SEXY Options para sa Retirement

1. SSS (Social Security System)
   • Siguraduhing naka-maximum contribution ka.
   • May bagong pension booster: kapag nag-withdraw ka matapos ang isang taon, 1% lang ang kaltas sa dividends—mas flexible kaysa iba.
2. Pag-IBIG MP2
   • Paborito ko rin. Pero tandaan, kapag nag-pre-terminate ka, kalahati ng dividends ang mawawala.
   • Kung gusto mo ng guaranteed na halos walang bawas, baka mas okay munang dagdagan ang SSS booster.
3. Rental Property
   • Magandang income source pag malapit ka nang mag-retire.
   • Malaki ang initial outlay pero para ka nang sumusuweldo with minimum effort pagkatapos
4. Cooperative Time Deposit
   • Wala ngang PDIC, pero malakas ang impact sa komunidad.
   • Bonus: Walang withholding tax sa interest.
5. Rural Bank Time Deposit
   • Basta Php1 million per bank ang limit mo, covered ka pa rin ng PDIC.
   • Kung kukuha ka ng 5-year term pataas, zero tax na sa interest

Iba Pang Pinaglalagyan Ko

• Cooperative Share Capital
  • Halimbawa: LKBP sa Bulacan—14% dividends noong 2022, 9% noong 2023.
  • Downside: kailangan mong mag-withdraw bilang miyembro kung gusto mong makuha agad ang pera.
• Retail Treasury Bonds at Retail Dollar Bonds
  • Minimum noong huling RTB offer ng gobyerno: P5,000, tapos top-up na P1,000.
  • Minimum noong huling RDB offer ng gobyerno: $300, tapos top-up na $100.
  • Tax-free, magandang hedge kung may future travel plans ka.
• Money Market at Bond Funds
  • Ok para sa liquidity, pero huwag aasahang mataas ang balik.
• Real Estate Investment Trusts (REITs)
  • Habang mababa pa ang market, magandang timing.

Company Match Schemes: Halimbawa sa SEDPI

Sa SEDPI, kung nagse-save ka ng 10% ng sahod mo, tinatapatan namin ng 5%. Kung ayaw mong mag-save? Wala kang match. Walang salary loan din—kung may emergency, wini-withdraw mo ’yung sariling ipon mo, hindi ka uutang.

Final Reminders

1. Unahin ang S, E, X bago Y.
2. Huwag makuha sa “malaking tubo” kung kompromiso naman ang seguridad at liquidity.
3. Idiversify ang investments mo: SSS booster, MP2, cooperative at rural bank time deposits, at kung kaya mo, rental property o REITs.
4. Komunikasyon ang susi—ipaalam sa pamilya o HR para may support system ka.
5. Create automatic systems para iwas analysis paralysis at impulse decisions.

Ako si Sir Vince, financial guro at your service. Tandaan: Ang pagyaman, napag-aaralan at napagtutulungan.